ಬೀಜಿಂಗ್: ಮಾನವನ ಮುಂದಿನ ತಾಣವಾಗಬಲ್ಲಂತಹ ಕೆಂಪು ಗ್ರಹ, ಮಂಗಳನ ಅಂಗಳವು ಒಂದೊಮ್ಮೆ ಅಗಾಧವಾದ ನೀರು ಮತ್ತು ಸಮುದ್ರತೀರಗಳನ್ನು ಹೊಂದಿತ್ತು ಎನ್ನುವ ವಿಷಯ ಬೆಳಕಿಗೆ ಬಂದಿದೆ. ಚೀನಾದ ಝುರಾಂಗ್ ರೋವರ್ ಮತ್ತು ಅದರ ನೆಲದೊಳಗೆ ಹಾಯುವ ರಾಡಾರ್ ಮೇ 2021 ರಿಂದ ಮೇ 2022 ರವರೆಗೆ ಕಾರ್ಯನಿರ್ವಹಿಸಿರುವ ಸಂದರ್ಭದಲ್ಲಿ ಪ್ರಾಚೀನ ಸಮುದ್ರ ತೀರಗಳನ್ನು ಪತ್ತೆ ಮಾಡಿದೆ.
ಹೊಸ ಸಂಶೋಧನೆಯ ಪ್ರಕಾರ, ಮಂಗಳವು 3.6 ಶತಕೋಟಿ ವರ್ಷಗಳ ಹಿಂದೆ ಭೂಮಿಯಂತೆಯೆ ಮರಳಿನ ಕಡಲತೀರಗಳ ವಿರುದ್ಧ ಅಲೆಗಳನ್ನು ಹೊಂದಿರುವ ಸಾಗರವನ್ನು ಹೊಂದಿದ್ದಿರಬಹುದು ಎಂದು ಅಂದಾಜಿಸಲಾಗಿದೆ.
ಚೀನಾದ ರೋವರ್ ಮಂಗಳನ ಯುಟೋಪಿಯಾ ಪ್ಲಾನಿಟಿಯಾ ಎಂಬ ಪ್ರದೇಶದಲ್ಲಿ ಇಳಿದಿತ್ತು. ಇದು ಮಂಗಳನ ಮೇಲೆ ತಿಳಿದಿರುವ ಅತಿದೊಡ್ಡ ಜಲಾನಯನ ಪ್ರದೇಶವಾಗಿದೆ. ಇದು ಗ್ರಹದ ಉತ್ತರ ಗೋಳಾರ್ಧದಲ್ಲಿ ನೀರಿನ ಅಲೆಗಳ ಅವಶೇಷಗಳ ಪಕ್ಕದಲ್ಲಿದೆ. ಅಲೆಗಳು ತೀರದ ಅವಶೇಷಗಳನ್ನು ಪ್ರತಿನಿಧಿಸಬಹುದೇ ಎಂದು ವಿಜ್ಞಾನಿಗಳು ಪ್ರಶ್ನಿಸುತ್ತಿದ್ದುದರಿಂದ ಝುರಾಂಗ್ ಪ್ರಾಚೀನ ನೀರಿನ ಪುರಾವೆಗಳನ್ನು ಹುಡುಕಲು ಹೊರಟಿತ್ತು. ಗುಪ್ತ ಶಿಲಾ ಪದರಗಳನ್ನು ಪರೀಕ್ಷಿಸಲು ಮಂಗಳನ ಮೇಲ್ಮೈನಿಂದ ಒಳಗೆ ಇಣುಕುವ ಝುರಾಂಗ್ ನ ರಾಡಾರ್ ಸಂಗ್ರಹಿಸಿದ ದತ್ತಾಂಶದ ಆಧಾರದ ಮೇಲಿನ ಅಧ್ಯಯನವನ್ನು ನ್ಯಾಷನಲ್ ಅಕಾಡೆಮಿ ಆಫ್ ಸೈನ್ಸಸ್‌ನ ಪ್ರೊಸೀಡಿಂಗ್ಸ್ ಜರ್ನಲ್‌ನಲ್ಲಿ ವಾರದ ಹಿಂದೆಯೆ ಪ್ರಕಟಿಸಲಾಗಿದೆ.
“ಪುರಾತನ ಕಡಲತೀರಗಳು ಮತ್ತು ಪ್ರಾಚೀನ ನದಿಗಳ ಮುಖಜಭೂಮಿಯಂತೆ ಕಾಣುವ ಮಂಗಳ ಗ್ರಹದ ಸ್ಥಳಗಳನ್ನು ನಾವು ಕಂಡುಕೊಳ್ಳುತ್ತಿದ್ದೇವೆ ”ಎಂದು ಪೆನ್ ಸ್ಟೇಟ್‌ನ ಭೂವಿಜ್ಞಾನ ವಿಭಾಗದ ಭೂವಿಜ್ಞಾನದ ಸಹಾಯಕ ಪ್ರಾಧ್ಯಾಪಕ ಅಧ್ಯಯನ ಸಹ ಲೇಖಕ ಬೆಂಜಮಿನ್ ಕಾರ್ಡೆನಾಸ್ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
“ನಾವು ಗಾಳಿ ಮತ್ತು ಅಲೆಗಳ ಪುರಾವೆಗಳನ್ನು ಕಂಡುಕೊಂಡಿದ್ದೇವೆ. ಇಲ್ಲಿ ಮರಳಿನ ಕೊರತೆಯಿಲ್ಲದ ಸರಿಯಾದ, ರಜೆಯ ಶೈಲಿಯ ಬೀಚ್ ಇತ್ತೆನ್ನುವುದು ತಿಳಿಯುತ್ತದೆ” ಎಂದು ಅಧ್ಯಯನದಲ್ಲಿ ಬರೆದುಕೊಂಡಿದ್ದಾರೆ.
ಕೆಂಪು ಗ್ರಹವು ಒಂದು ಕಾಲದಲ್ಲಿ ಬೆಚ್ಚಗಿನ, ಆರ್ದ್ರ ವಾತಾವರಣವನ್ನು ಹೊಂದಿತ್ತು ಮತ್ತು ಮೇಲ್ಮೈಯ ಮೂರನೇ ಒಂದು ಭಾಗವನ್ನು ಆವರಿಸಿರುವ ಸಾಗರವನ್ನು ಹೊಂದಿತ್ತು ಎಂಬುದನ್ನು ಈ ಶೋಧನೆ ಬಹಿರಂಗಪಡಿಸಿದೆ. ಈಗಲೂ ಕೂಡಾ ಮಂಗಳನ ಮೇಲೆ ಘನೀಭವಿಸಿದ ಹಿಮದ ಮಾದರಿಯಲ್ಲಿ ನೀರಿನ ಅಸ್ತಿತ್ವ ಇರುವುದು ಸಂಶೋಧನೆಗಳಿಂದ ಬಹಿರಂಗವಾಗಿದ್ದು, ಮುಂದಿನ ದಿನಗಳಲ್ಲಿ ಮಂಗಳನ ಅಂಗಳದಲ್ಲಿ ಮನೆಯ ಕಟ್ಟುವವರಿಗೆ ಶುಭವಾರ್ತೆಯೊಂದು ತಿಳಿದುಬಂದಿದೆ.
